IDEAPasonan pa tuma (sigui) ora di cuminsa un negoshi

A. Bo ta naci na Aruba y bo tin nacionalidad Hulandes, of bo ta un persona cu a naturalisa hulandes na Aruba, mayor di 18 aña:

 

Den caso cu bo kier habri un negoshi den forma di un negoshi propio (“eenmanszaak”) of bo kier ta socio di un sociedad collectivo (VOF) of Gerente di un entidad legal, Bo NO mester aplica pa un permiso di negoshi na Departamento di Asunto Economico, Comercio e Industria. Pa tur otro forma legal bo mester sigui e pasonan menciona na B.

 

1. Acudi directamente na Camara di Comercio pa registra bo negoshi usando e formularionan di registro comercial. Bo mester entrega e siguiente documentonan: 

  • Paspoort original mas un copia di e paspoort (solamente e pagina cu e potret) of e original y copia di bo cedula valido (copia di ambos banda) di e doño y di e representante autorisa, si esaki ta aplicabel;
  • Declaracion di inscripcion di registro di censo di Aruba no mas bieu cu un luna di e doño of di e representante autorisa, mencionando e adres;
  • Referente e adres di e negoshi: copia di recibo di coriente, awa of telefon (no mas bieu cu 2 luna) di e adres di e negoshi of copia di e huurcontract of copia di e acta di compra di e edificio unda e negoshi ta bay establece of un carta di e doño di e edificio unda e ta bay di acuerdo pa e uzo di su edificio pa e negoshi menciona. Den e carta e tin cu indica cu e ta responsabilisa su mes pa entrega tur corespondencia na e doño di e negoshi (e Declaracion)
  • Si e doño di e negoshi ta casa pafo di comunidad di bienes (“buiten gemeenschap van goederen”): un copia di e certificado di casamento tin cu wordo entrega.
  • Si e doño di e negoshi tin menos cu 18 aña di edad: un copia di e decision di corte of di e trouwboek mester wordo entrega. Si e registracion ta via di un representante autorisa: mester entrega un carta original di autorisacion hunto cu paspoort of ID (original)
  • Pago di e prome registracion. Mester check riba e website di Camara di Comercio si e nomber di e negoshi ta existi caba.

 

2. Acudi despues na departamento di belasting (SIAD) pa registra bo negoshi. Como anexo di e formulario di registracion di un “eenmanszaak” of di un independiente (“zelfstandige”), entrega un copia di un identificacion valido (paspoort, rijbewijs of cedula) di e doño di e negoshi, prueba di registracion na Camara di Comercio, contracto di huur of compra di e compania mester wordo presenta. Si un di tres persona (un individual of un compania) ta wordo uza pa e registracion, bo mester uza e formulario autorisa obtenibel na SIAD of download esaki for di nan website. Den caso di un compania un prueba di identidad di e compania concerni manera prueba di registracion na Camara di Comercio ta necesario. Despues cu registracion di e negoshi a tuma luga, un pakete cu formulario pa pago di diferente belasting (impuesto riba salario, BBO, etc.) y gastonan social (primanan di AOV/ AWW y AZV) lo wordo entrega via post.

 

3. Mester inscribi bo negoshi na Sociale Verzekeringsbank (SVB) conforme e “Landsverordening Ziekte- en Ongevallenverzekering” y aki un prueba di registro di Camara di Comercio, un lista completo di e empleadonan, un formulario cu informacion di e compania y un declaracion di banco incluyendo cuenta di banco mester wordo duna na e seccion “premieheffing” di SVB Eagle. Si acaso e registracion ta wordo haci door di un otro persona cu no ta e doño, un carta di autorisacion firma pa e doño y un copia di ID di e doño y di e representante autorisa mester wordo presenta.

 

4. Acudi despues na Departamento di Labor y Investigacion (DAO) pa duna un lista di personal den caso cu tur vacatura ta yena. Den caso cu falta personal un notificacion di vacatura pa trahadonan local mester tuma luga na Departamento pa Progreso Laboral (DPL). Si e ora ainda e vacaturanan no ta yena y lo tin mester di trahadonan stranhero, mester tin un notificacion di vacatura obligatorio di 4 siman na DPL.

Dependiendo di e tipo di actividad di e compania, peticionnan pa otro permitnan necesario, manera un ijs, restaurant A, restaurant B, bierhuis, koffiehuis, slijt, logement, grossiers of hotelvergunning, conforme “Vergunningsverordening”, mester wordo dirigi na Minister di Salubridad y Deporte, pa medio di Director di “Directie Wetgeving en Juridische Zaken” (DWJZ) y entrega akinan. Den caso cu e negoshi ta concerni “Watersport”, a base di e “Landsbesluit Openbare Wateren en Stranden” mester un permit di Minister di Transporte. Si un permit ta necesario conforme “Hinderverordening”, e peticion pa cu esaki mester wordo dirigi na Minister di Husticia, pa medio di Director di DWJZ.

 

5. Dependiendo di e tipo di actividad di e compania, peticionnan pa otro permitnan necesario, manera un ijs, restaurant A, restaurant B, bierhuis, koffiehuis, slijt, logement, grossiers of hotelvergunning, conforme “Vergunningsverordening”, mester wordo dirigi na Minister di Salubridad y Deporte, pa medio di Director di “Directie Wetgeving en Juridische Zaken” (DWJZ) y entrega akinan. Den caso cu e negoshi ta concerni “Watersport”, a base di e “Landsbesluit Openbare Wateren en Stranden” mester un permit di Minister di Transporte. Si un permit ta necesario conforme “Hinderverordening”, e peticion pa cu esaki mester wordo dirigi na Minister di Husticia, pa medio di Director di DWJZ.


B. Bo ta naci na Aruba pero bo no tin nacionalidad Hulandes, of bo no ta naci na Aruba pero bo tin nacionalidad Hulandes pero no naturalisa Hulandes na Aruba, of bo no ta naci na Aruba y bo tin otro nacionalidad bo mester bai na Departamento di Asuntonan Economico pa pidi un permiso pa un negoshi propio (eenmanszaak). 

Of

Pa un persona juridico (rechtspersoon) of un persona natural (natuurlijke persoon) cu ta desea cuminsa un entidad legal manera, Sociedad Colectivo (Vennootschap onder firma), Sociedad Anonimo (N.V.), Sociedad Responsabilidad Limita (V.B.A.), Sociedad Exento Arubano (A.V.V.) of un Permiso di Gerencia mester acudi na Departamento di Asuntonan Economico:

 

1. Un permiso pa establece negoshi (vestigingsvergunning) conforme e “Vestigingsverordening Bedrijven” ta necesario. Pa esaki ta dirigi un peticion na Minister di Asuntonan Economico y mester wordo entrega na Departmento pa Asuntonan Economico, Comercio y Industria, hunto cu e documentonan necesario.

 

2. Despues di a risibi e permiso menciona, mester sigi e pasonan describi bou di A puntonan 1 te 5. Pa inscripcion di un negoshi propio cu ta rekeri un permiso pa establece negoshi, un copia di e permiso menciona mester wordo duna. Inscripcion di un N.V. ta sosode normalmente via un notario. Pa registracion di N.V.’s y otro entidadnan na SIAD, mester inclui e siguiente documentonan:

  • Copia di e permiso pa establece negoshi;
  • Prueba di inscipcion na Camara di Comercio;
  • Copia di e acta unda e sociedad a keda estableci y e statuutnan;
  • Copia di paspoort/rijbewijs of ID.

 

Tambe tur detaye personal di e directornan mester ta inclui. Pa inscripcion di e N.V. na SVB, mester presenta ademas di e documentonan menciona bou A punto 3 e statuutnan di e N.V. y e copia di e permiso di establecimento di e negoshi. Si e inscripcion ta sosode door di un otro persona cu e director, un carta di autorisacion, firma pa e director y un copia di e ID di e director y di su representante autorisa mester wordo presenta.

 

C. Den tur caso cu bo tin un negoshi por acudi na Departamento pa Asuntonan Economico, Comercio y Industria pa:

 

Orario di tiendanan (Winkelsluiting): den caso cu bo habri bo negoshi pafor di e orarionan normal di 6.00 a.m. te cu 6.30 p.m. di dialuna pa diasabra y ora bo habri bo negoshi riba un diadomingo/dia di fiesta bo mester di un permiso.
E permiso ta costa Afl. 4 na stampia pa procesa e peticion y Afl. 8 na stampia pa pega riba e permiso. Por pidi e permiso pa ful un aña (januari te cu december). Esaki no ta aplicabel pa negoshinan den sector di Horeca. Negoshinan den e sector di Horeca mester aplica na Centro di Husticia (DWJZ) pa e permiso corespondiente.

Indicacion di prijs (Prijsaanduiding) of prijsnan maximo (Maximum prijzen): den caso cu bo tin un negoshi cu ta bende productonan esaki nan ta mara na ley di indicacion di prijs. Tur producto mester tin visibel un prijs pa publico y esaki mester ta na florin Arubano (Afl.). Si bo ta bende productonan cu ta cai den e canasta basico nan ta mara na prijsnan maximo. Tambe den caso cu bo ta bende of importa webo bo mester di un permiso special (ontheffing).

Ampliacion di un permiso di establecimento existente/mudamento di un negoshi existente/cambio den un permiso di establecimento existente of cambio den e proposito den un permiso di establecimento existente/establece un sucursal of otro oficina na un otro lugar cu e establecimento principal/permiso di gerencia. Den tur e casonan aki mester un permiso conforme e “Vestigingsverordening Bedrijven” y por acudi na e seccion di Establecimento di Negoshi.

 

Idea, Maart 2013

IDEAImportacion/Exportacion

Importacion y Exportacion ta transaccionnan diario haci pa hopi empresario grandi y chikito. Aruba, un isla cu ta importa mas cu 90 porciento di tur loke e ta consumi ta haci cu ta hopi importante pa sa e reglanan di importacion. Esaki ta debi cu mientras cu bo negoshi ta crece bo por haya bo confronta cu e necesidad di importa of te hasta exporta bo producto. P’ esey ta hopi importante pa sa e reglanan tocante importacion y exportacion.

Tur producto cu drenta e mercado Arubano, en principio ta suheto na derechonan di aduana. E derechonan aplicabel ta derecho di importacion y accijns y cargo economico. E porcentahe ta depende di e tipo di producto cu bo ta importa.

Derechonan di importacion aplicabel (calcula a base di e balor c.i.f.):

  • Productonan basico
  • Productonan general
  • Productonan semi luhoso (manera tabaco y alcohol)
  • Productonan di luho

 

 

E productonan di e canasta basico cu ta lechi pa baby, koffie no instantaneo, hariña di funchi, margarina, lechi koffie likido, lechi polvo, manteca, aros, azeta dushi y te den saco no ta paga derechonan di importacion. Cuminda pa baby, koffie instantaneo y te instantaneo ta paga 6% di derecho di importacion. Solamente sucu ta paga Afl. 1,50 pa cada 100 kilo netto na derecho di importacion. Ta cobra accijns riba cerbes, sigaria y alcohol. E porcentahenan referente por wordo mira riba e website di SIAD y Aduana. E accijns pa gasolin ta Afl. 61,40 pa hectoliter, pa diesel Afl. 38,20 pa hectoliter y pa kerosin Afl. 33,50 pa hectoliter. Riba tur importacion ta cobra 1.5% di BBO.

Pa mas informacion tocante reglanan di importacion riba diferente productonan y derechonan di importacion por bishita e website di SIAD y Aduana.


Documentonan rekeri pa importacion

Factura:
mester menciona informacion comercial manera marca y number, balor di e mercancia indicando si ta balor f.o.b. of c.i.f 

Bill of Lading/Airway bill
E documento mester indica number di esun cu ta manda e carga, number y adres di esun cu ta ricibi’e, Puerto di destinacion, descripcion di e mercancia, lista di flete y otro gastonan, number di bill of lading den henter e set y fecha y firma di aceptacion oficial di e carga a bordo di e barco.

Agentenan
E manera mas comun cu companianan productor ta usa pa subi mercado local cu nan productonan ta door di apunta un importado como agente comercial. Esaki ta facilita entrada grandemente, paso e agente cu su conocemento local ta den e posicion pa ofrece e asistencia tecnico y di mercadeo mas adecua. Normalmente un agente por cubri henter e isla.

Pa kico exporta?
Exportacion semper ta cuminsa cu e pregunta: cua necesidad nos por satisface cu loke nos ta ofrece y con nos por yena e necesidad ey? E punto mas importante ora di exporta ta pa surpasa diferencia entre consumidornan pafo y paden di bo pais of frontera. Cu esaki nos kiermen, cu mester haci e espacio imaginario (diferencia den idioma, cultura, custumber) di e frontera entre bo mes pais y e pais caminda bo kier exporta, mas chikito. Mas chikito e buraco ta, mas facil y productivo e exportacion ta bay ta. Pa exportadonan principiante, ta recomendabel pa exporta den paisnan den region caminda mercado y cultura nan ta comparabel cu esun di nos pa asina reduci gastonan di transporte y riesgonan. No mester adapta e formula di e producto asina drastico y e gerencia tin miho bista y control riba actividadnan den exterior.

IDEAPasonan pa exportacion


  • Motibo pa exportacion: E motibonan por ta hopi pero un di e motibonan principal ta cu e mercado local ta of a bira demasiado chikito.

    Otro motibonan crucial pa exporta ta:

    • Mercado local ta malo;
    • forsa di compra a baha;
    • situacion financiero ta malo;
    • bo producto no ta prioridad pa e consumido;
    • bo producto ta unico y bo sa cu riba mercado den exterior no tin e producto cu bo ta bende y e ta un reto.

     

    Analisa e motibonan bon pakico den bo caso bo a dicidi pa exporta.

    • Selecta e producto cu miho potencial;
    • Evalua e producto pa exportacion;
    • Scoge bo mercadonan di exportacion;
    • Analisa e industria;
    • Analisa bo empresa;
    • Distribucion y presentacion di bo producto
    • Rendimento (si bo no haci ganashi bo compania no lo sobrevivi)
    • Ta organisa y cla pa exportacion (bo administracion y bo sistema di pedido mester ta eficiente)
    • Traha un plan di exportacion
    • Incentivo y convenio
      1. Caribbean Basin Initiative, areglo pa exporta cierto productonan fabrica na Aruba pa Merca liber di impuesto
      2. LGO, areglo pa exporta cierto productonan fabrica of procesa suficientemente na Aruba pa Europa liber di impuesto
      3. Free zone, zona liber local cu diferente incentivo pa empresanan exportado

     

  • Cuminsa Exporta
    Despues di a tuma tur e pasonan anterior, a yega e ora pa exporta. Tuma e riesgo, sino nunca lo bo no sa si bo lo a logra. Siña di bo fayonan y sigui. Mantene contacto cu bo exportadonan local cu ta activo riba e terenonan aki.

IDEARecomendacionnan ora di habri un negoshi

No mester haci

Cuminsa un negoshi cu un persona cu bo no conoce of bo no ta confia Hopi negoshinan no ta funciona bon door cu tin problema entre partners. Ta masha comun cu personanan ta cuminsa un negoshi pa yuda otro persona cu no ta bin na remarca pa un permiso di negoshi. Un bes cu bo nomber wordo uza pa cuminsa un negoshi, bo lo ta responsabel pa e asuntonan legal y fiscal.
Copia – haci mesun cos Sea innovativo y creativo. Pensa profundamente riba e sucursal of negoshi cu bo kier habri. Kisas bo ta number 501….y e sorto di negoshi ey no ta funciona bon mas. Duscuti ideanan nobo, producto y servicio cu bo kier trece den mercado pa asina bo negoshi por crece.
Subestima bo clientenan Continuamente check cu bo clientenan kico ta nan necesidad. Informa nan tocante bo productonan/servicionan. Hasi cambio den bo negoshi pa mantene un efecto WOW. Promove bo negoshi.
Uza tur bo reservanan Tin bon tempo y tempo menos bon. Percura pa tin un reserva pa tempo menos bon.
No cumpli cu bo obligacion financiero Corda cu bo record di credito ta hopi importante. Paga tur bo debenan na tempo y asina bo por tin posibilidad pa haya mas financiamento pa asina bo negoshi por crece mas.
Hasi gastonan innecesario den expansion di oficina of muebles Tin prioridadnan mas importante manera cuminsa instala un bon administracion, consulta un abogado of consehero fiscal.

 

Mester tene na cuenta

 

Conoce e tipo di negoshi cu bo kier cuminsa Colecta tur e informacionnan relevante riba e idea cu bo tin pa bo negoshi. Ta necesario pa bo conoce exactamente e tipo di negoshi cu bo kier cuminsa cune. Busca riba internet of bishita negoshinan similar pa haya informacion riba e producto of servicio cu bo kier produci/bende. Ken ta bai ta bo suministrado y di unda nan ta. Con bo mercancia lo wordo transporta y entrega, ki tipo di permiso lo bo mester pa importa bo mercancianan y kico lo ta e gasto.
Conoce bo mercado y bo cliente Con e mercado ta pa bo producto y servicio riba e isla y den region? Tin mas negoshi manera esun di bo? Tin mercado habri pa bo tipo di negoshi? E mercado ta creciendo? Bo por suministra e producto of servicio na un prijs/calidad competitivo? Ta importante pa sa ta ken lo bai ta bo clientenan y pa cumpli cu nan necesidad.
Ki tipo di permiso bo mester Depende di e tipo di negoshi cu bo kier cuminsa, lo bo tin mester di permisonan adicional (diferente). Check cu IDEA ki tipo di permiso di otro instancia di gobierno bo lo tin mester.
Structura di negoshi y organisacion Bo kier cuminsa un negoshi propio (Eenmanszaak) of bo kier un otro tipo di entidad (forma legal) di negoshi? Cua di nan ta esun mihor pa bo tipo di negoshi of bo situacion personal?
Busca conocemento riba e tereno financiero Bo tin e recurso financiero necesario pa por cuminsa bo negoshi of bo tin mester di capital externo (prestamo di banco of partner cu capital)?
Busca conseho con pa “set up” un administracion No ta necesario pa bo tin e conocemento (knowhow) pa bo hasi bo mes un administracion di negoshi. Busca ayudo. Tin diferente instancianan y cursonan disponibel cu por yuda bo pa haya e abilidad necesario pa “set up” bo mesun administracion of bo por laga e servicionan aki den man di un compania di administracion/accounting y tambe por consulta un consehero di impuesto.
Recursonan Humano ta hopi importante pa bo negoshi Ki tipo di empleadonan bo lo tin mester, cua abilidad nan mester tin pa por yudabo den bo negoshi? Bo ta dispuesto pa inverti den bo empleadonan? Enseñansa pa Empleo y otro instancianan por yuda bo desaroya bo forsa laboral. Bo mester ta sigur cu bo ta cumpli cu e ley laboral y tin un bon concepto di contract cu bo empleadonan.
Inverti den tecnologia Den e mundo di awendia bo no por sobrevivi si bo negoshi no ta automatisa of ta uza tecnologia.
Contacto Ta hopi importante pa cera conoci y tin contacto cu esnan encarga y concerni.
Cuminsa un negoshi nobo door di prepara un Plan di negoshi (“Business Plan”) Pa yuda bo contesta tur e preguntanan bo mester un plan di negoshi (business plan). E no mester ta amplio. Pero e lo yudabo coordina bo ideanan y lo guia bo pa sa si bo negoshi lo ta exitoso of no.
Cumpli cu e formalidadnan legal Registra bo negoshi na Camara di Comercio y si ta aplicabel entrega un peticion oficial pa un permiso di establecimento di bo negoshi na DEZHI.
Cuminsa chikito y pensa grandi IDEA por yuda bo y guia bo pa bo hasi e prome pasonan. IDEA ta traha cu otro organisacionnan manera Camara di Comercio, AIB Bank, ARINA, Enseñansa pa Empleo y otronan.

IDEADerechonan y Obligacion di Empleado y Dunado di Trabou

Den un relacion laboral entre un empleado y un dunado di trabou, ambos partido tin obligacionnan cu nan tin cu cumpli cune. Generalmente un empleado ta drenta un relacion laboral cu un dunado di trabou cu un contract laboral. Un contract laboral ta un contract den cual un partido, e empleado ta pone su mes 1. Den servicio di un otro partido, e dunado di trabou, 2. Pa traha a cambio di un salario, y 3. Durante cierto oranan. Un contract laboral tin un forma liber, kiermen cu e por ta verbal of scirbi.

 

Partidonan por conveni un periodo di prueba. Durante e periodo di prueba aki, ambos partido por termina e relacion di trabou inmediatamente sin tin mester di un rason/motibo. Un periodo di prueba mas largo cu dos luna ta prohibi.

 

E duracion di un contract laboral por ta pa un tempo defini of indefini. Un contract laboral pa un periodo defini di tempo tin un fecha di terminacion determina di antemano y por wordo haci solamente den forma scirbi y solamente bou di e siguiente circunstancianan:

 

  1. Ora ta trata di trabou cu mester wordo haci durante di un tempo/periodo specifico di aña door di crecemento di actividad economico di e compania;
  2. Den caso cu un empleado permanente tin un absentismo temporario;
  3. Ora ta trata di un projecto specifico, describi den detaye;
  4. Ora ta trata trabounan independiente y iregular.

 

Si un contract ta regarda otro rason cu esunnan menciona aki riba, e no por wordo considera un contract pa un tempo defini. Esaki kiermen cu e no por wordo termina segun e fecha stipula. Den e caso aki un permit explicito di e Director di Departmento di Labor ta rekeri. E mesun regla aki ta aplicabel pa contractnan pa tempo defini cu a wordo extende cu un break di no mas cu 61 dia.
Tur otro relacion laboral ta pone un empleado den servicio di un dunado di trabou bou di un contract pa un tempo indefini.

 

Leynan laboral di Aruba cu un bon dunado di trabou mester cumpli cune si e tin un of mas empleado den su servicio.
E dunado di trabou mester paga e empleado su salario na tempo y e salario no por ta menos cu minimumloon (Afl. 1604,60).

 

E salario stipula di acuerdo cu e oranan di trabou (p.e. salario pa ora, pa siman, pa kinsena of pa luna) mester wordo paga di e momento cu un empleado ta drenta servicio te cu e dia cu e relacion di trabou termina. E dunado di trabou no ta obliga pa paga un empleado pa e tempo cu e no a traha, manera stipula den e contract laboral (no work, no pay).
Tin cierto excepcionnan pa cu e provision legal aki. Un empleado ta mantene su derecho riba salario den caso di:

 

  • Malesa of accident; si un empleado no por traha door di malesa of accident, e mester ricibi ful su salario di e prome dia cu e ta incapacita y pa un periodo cortico di tempo (algun siman). Tur empleado cu ta cai bou di e limite di salario, manera stipula door di SVB mester registra na SVB pa nan por wordo paga den caso di malesa of accident. E prome tres dianan di incapacitacion mester wordo paga 100% door di e dunado di trabou. Di e di cuatro dia padilanti, SVB lo paga 80% di e salario y e dunado di trabou 20%, pa asina e empleado por ricibi 100% di su salario pa un periodo maximo di seis siman. Prolongacion di malesa despues di e periodo di seis siman kiermen cu SVB lo sigui paga e empleado 80% di su salario pa un periodo maximo di dos aña. Empleadonan cu ta riba e limite di salario, manera stipula door di SVB, ta wordo paga door di e dunado di trabou te cu un periodo di seis siman. Un periodo mas largo di pago por wordo regla den un acuerdo colectivo.
  • Obligacionnan legal; ora cu un empleado no por traha door di un obligacion legal di un ley di estado, cu no por wordo haci durante su tempo liber (p.e. votamento den eleccionnan nacional, registracion di un yiu cu a caba di nace), e mester ricibi ful pago di salario pa e periodo di absentismo cortico y rasonabel (par di ora)
  • Circunstancianan extraordinario; ora un empleado no por traha door di circunstancianan extraordinario (p.e. casa ta hayando yiu, morto/entiero di miembronan di famia) e empleado tin derecho riba ful su salario pa un periodo cortico y rasonabel (par di ora/dia).
  • Negligencia di dunado di trabou; ora cu e empleado ta dispuesto y por traha pero e dunado di trabou no ta tuma bentaha di esaki, e empleado tin derecho riba ful su salario.

 

Un maximo di 8½ ora diario pa un siman di trabou di 5 dia, ta permiti pa no surpasa 42½ ora, of un maximo di 8 ora diario cu no ta surpasa 45 ora pa un siman di trabou di 6 dia, cu excepcion di empresanan manera hotel, casino, restaurant y refineria, pa cual trabou di shift ta rekeri y cu ta permiti un maximo di 48 ora pa siman.

 

Trahamento di overtime no ta obligatorio; e dunado di trabou por pidi e empleado pa traha overtime, basta e ta ricibi e pago apropia, den caso di urgencia of den situacionnan excepcional. Pagamento di overtime ora cu overtime wordo traha como extension di un dia normal di trabou of durante e break di un empleado, ta igual na 150% di e salario. Overtime traha riba un dia di sosiego of dia liber ta wordo recompensa cu 200% di e salario. Den un contract di trabou colectivo, partidonan por conveni diferente. Overtime segun un schedule ta rekeri un permit di Departamento di Labor.

 

Empleadonan tin derecho riba vacacion tur aña. E cantidad di dianan di vacacion no mag di ta menos cu tres biaha e cantidad di dianan di trabou pa siman. Sinembargo, un empleado cu ta traha seis dia pa siman tin derecho riba un minimo di 15 dia di vacacion pa aña. Un empleado ta mantene su derecho riba su salario durante vacacion. Un empleado ta perde su derecho riba vacacion despues di un periodo di dos aña. Cada dia di vacacion cu no a wordo uza cu resta ora un relacion laboral termina mester wordo paga na e empleado.

 

E dunado di trabou tin obligacionnan administrativo adicional cu cual e tin cu cumpli:

 

  • E dunado di trabou mester mantene un registro di labor (arbeidsregister) di tur e trahadonan emplea den e compania. E registro laboral aki mester contene tur informacion personal y di trabou di ful e personal.
  • E dunado di trabou mester posee un schedule di trabou (arbeidslijst) aproba door di e director di Departamento di Labor. E schedule aki ta contene e oranan di trabou, tempo di descanso diario como tambe e total di oranan di trabou pa siman y tambe dianan liber. E schedule di trabou mester wordo poni na un luga cu ta visibel pa tur empleado concerni.
  • Si tin circunstancianan special cu ta rekeri overtime, e dunado di trabou mester haya un permit pa overtime (overwerkvergunning) aproba door di Departamento di Labor.
  • Si un dunado di trabou tin un of mas empleado cu ta rekeri un permit di trabou (werkvergunning) e dunado di trabou mester por demostra cu e permitnan ta valido pa traha na e compania pa cual a pidi esaki.
  • E dunado di trabou mester zorg cu pa cada empleado cu ta gana un salario anual di menos cu Afl. 27.000, un buki di empleado (werkboek) mester wordo teni. E buki di empleado aki ta prueba di registracion y participacion riba mercado laboral y por wordo haya pa Afl. 2 na Departamento di Labor.
  • E dunado di trabou mester presenta anualmente un planificacion di trahado (Manpowerplanning) na Departamento di Labor, specificando un resumen di salarionan y cantidad di empleado den servicio como tambe e demanda pa empleado y den cua posicion nan ta rekeri pa e aña siguiente.
  • E dunado di trabou mester presenta anualmente un forma di registracion di personal (personeelsopgave), cu ta parti di e Resumen di Entrada y Salario (Verzamelloonstaat) di Departamento di Impuesto (SIAD).

 

Ademas tin otro obligacionnan legal cu cual e dunado di trabou tin cu cumpli cune banda di e leynan laboral. E obligacionnan aki ta, por ehemplo:

 

  1. E dunado di trabou tin e obligacion di registra tur su empleadonan na SVB.
  2. E dunado di trabou tin e obligacion di registra e compania na Camara di Comercio denter di tres dia for di e dia di su establecimento.
  3. E dunado di trabou tin cu cumpli cu tur e reglanan di e Ordenansa pa Establece un Negoshi y por acudi na Departamento pa Asunto Economico, Comercio y Industria pa informacion.
  4. E dunado di trabou tin cu paga tur impuesto mensual, manera loonbelasting, AOV y AWW na SIAD.
  5. E dunado di trabou tin e obligacion di raporta tur accident na e luga di trabou denter di 24 ora di e accident na autoridadnan local y na Departamento di Inspeccion Tecnico di Gobierno na telefon: 584-2073.

 

E empleadonan tin algun obligacion pa cumpli cune tambe. E empleado mester presenta na trabou na ora y mester traha segun locual ta coresponde cu su descripcion di trabou segun su miho abilidad. E empleado mester sigui e instruccionnan cu e dunado di trabou dune y mester cumpli cu e reglanan di e compania.